featured-image-8290

“Barselona”nın və İspaniya millisinin əfsanəvi müdafiəçisi Karles Puyol İker Kasilyasın tvitinin altında yazdığı zarafatını silib və ona görə üzr istəyib.

“Mən səhv etdim. Bu yöndəmsiz zarafat üçün üzr istəyirəm, bu, pis niyyətli deyildi və tamamilə yersiz idi. Başa düşürəm ki, bu, kiminsə hisslərini incidə bilər. LGBT icmasına hörmətim və dəstəyim var”, – Puyol öz “Twitter” səhifəsində yazıb.

18:53

Madrid “Real”ının keçmiş qapıçısı İker Kasilyas sosial şəbəkə hesabının hakerlər tərəfindən müvəqqəti olaraq ələ keçirildiyini yazıb.

O, məlum paylaşıma görə izləyicilərindən və LGBT icması üzvlərindən üzr istəyib.

Qeyd edək ki, bir müddət əvvəl futbolçunun hesabından cinsi oriyentasiyasını dəyişməsi barədə paylaşım olunub. Lakin təxminən bir saat sonra tvit silinib.

18:18

“Real” (Madrid) və İspaniya millisinin sabiq qapıçısı İker Kasilyas sosial şəbəkələrdə cinsi oriyentasiyasını dəyişməsi ilə bağlı açıqlamasını silib.

O, bunu paylaşımından təxminən bir saat sonra edib.

AS qəzetinin jurnalisti Xulio Botixo bununla əlaqədar ​​“Şaiyələrdən yorulan Kasilyas” başlıqlı məqalə dərc edib.

Müxbir qapıçının qadınlarla eşq macəraları ilə bağlı çoxsaylı şayiələr yayan mətbuatı ələ salmaq üçün belə açıqlama verməsini ehtimal edib.

17:21

Madrid “Real”ının  keçmiş qapıçısı İker Kasilyas homoseksual olduğunu yazıb.

“Ümid edirəm ki, mənə hörmət edirsiniz. Mən maviyəm. Hər kəsin bazar günü mübarək”, – keçmiş ispaniyalı qapıçı tvit ataraq qeyd edib.

Kasilyasın milli komandadakı keçmiş həmkarı, “Barselona”nın eks-müdafiəçisi Karles Puyol isə bu tvitə “Hekayəmizi danışmağın vaxtıdır, İker”, – yazaraq cavab verib.

Xatırladaq ki, 2009-cu ildə Kasilyas ispan teleaparıcı Sara Karbonero ilə görüşməyə başlayıb. 20 mart 2016-cı ildə onlar ailə qurublar. Cütlüyün iki oğlu var: Martin (2014) və Lukas (2016). 12 mart 2021-ci ildə cütlük 12 il birlikdə olduqdan sonra ayrıldıqlarını elan ediblər.

media-ruebc43fede91

Bənzər xəbərlər