featured-image-4802

Hacı Şahin Həsənli cümə xütbəsində “mehdiçilər”in hərəkətini pislədi

 

Dünən Bakının Məşədi Dadaş məscidində keçirilən cümə xütbəsində Azərbaycanın Britaniyadakı səfirliyinə edilən hücum pislənilib. Qafqaz Müsəlmanları İdarəsinin (QMİ) səlahiyyətli nümayəndəsi, ilahiyyatçı Hacı Şahin Həsənlinin vaizliyi ilə keçirilən xütbənin ikinci hissəsi bir gün Londonda baş verən hadisəyə həsr olunub.

Xətibin sözlərinə görə, Azərbaycanın Britaniyadakı diplomatik nümayəndəliyinə qarşı vandalizm hərəkətləri İslam dini ilə heç bir əlaqəsi olmayan rəftar və davranışdır: “Baxmayaraq ki, hücumu təşkil edən məlum qruplaşmanın üzvləri öz hərəkətlərini dini şüarlar altında edirlər, ancaq bu, dini hisslərin istismar edilməsidir. O insanların nə dini, nə də məzhəbləri var. Onların fəaliyyətinə nəzər yetirəndə görürük ki, fəaliyyətə başladıqları ilk gündən etibarən dinlərarası və ənənəvi məzhəblərarası qarşıdurma yaratmaq istiqamətində çalışıblar. Çox güman ki, bu işləri xarici xüsusi xidmət orqanlarının sifarişi ilə həyata keçirirlər”.

QMİ-nin səlahiyyətli nümayəndəsi hesab edir ki, onlar belə bir həssas dönəmdə – Məhərrəm ayı günlərində Azərbaycanda insanların dini hisslərinə toxunmağı qarşılarına məqsəd qoyublar: “Məzhəb və dinlərarası münasibətləri korlamaq və ona zərbə vurmaq üçün bu addımları atırlar. Əminliklə deyə bilərəm ki, bu kimi addımlar əvvəlcədən uğursuzluğa düçar olacaq. Azərbaycanın dini mühitində belə insanların hər hansı təsir imkanı yoxdur. Azərbaycanda ümumiyyətlə radikallığın sosial bazası yoxdur. Bəlkə də onlar bu ölkədə fəaliyyətlərini genişləndirə bilmədiklərinə görə öz aləmlərində Azərbaycandan qisas almağa, ölkəmizin imicinə zərbə vurmağa çalışırlar”.

Hacı Şahin Həsənli vurğulayıb ki, Azərbaycan səfriliyinə hücum zamanı təhqir olunan bayraq uğrunda minlərlə insan canını fəda edərək, şəhidlik zirvəsinə ucalıblar: “O bayrağın təhqir edilməsi Azərbaycan dövlətinin təhqir edilməsi ilə yanaşı, həm də dinimizin, inancımızın təhqir edilməsi deməkdir”.

 

Boyuksherg.az

Bənzər xəbərlər